Sobre nós

Obxectivos

O Grupo de Investigación SEPA-interea (GI-1447) ten como propósito contribuír á consolidación da Pedagoxía Social e da Educación Ambiental como ámbitos de coñecemento relevantes para as Ciencias Sociais e Humanas e, de xeito máis específico, para as Ciencias da Educación. Faino mediante unha actividade científico-académica comprometida, innovadora e en dialogo permanente con diversos axentes sociais e institucionais. Trátase dun quefacer que aposta por novos modos de educar e de educarse en sociedade, propoñendo estratexias que sexan de utilidade para as persoas e contribuíndo a mellorar o seu benestar e calidade de vida.

A tal fin, o Grupo SEPA-interea proponse como obxectivos fundamentais:

Incentivar e apoiar a creación, desenvolvemento e transferencia do coñecemento científico nos ámbitos da Pedagoxía Social e da Educación Ambiental.

Desenvolver proxectos e contratos de colaboración académica e científica (formación, investigación, innovación, etc.) con diversas entidades, colectivos e institucións educativas e sociais, tanto no contexto local como no internacional.

Actuar como plataforma de produción e difusión de coñecementos entre as comunidades docentes e investigadoras en diferentes contextos, territorios e realidades sociais.

Contribuír á formación de persoal docente e investigador, así como de profesionais da Pedagoxía Social e da Educación Ambiental.

Alentar e apoiar a realización de traballos de investigación con diferentes perfís e achegas (Teses de Doutoramento, Informes de avaliación e asesoramento, etc.).